Layag Paraw: Paraw Regatta Festival ng Iloilo City
17 Pebrero. Bagama’t binayo ang Iloilo ng malamig na ihip ng hangin mula sa Siberia, hindi nagpatalo ang mga Ilonggo sa kanilang talento na harapin ang bangis ng karagatan na humanaw sa kamuwangan ng mga Ilonggo bilang isa sa mga kilalalang seamen ng bansa. Ang Paraw Regatta Festival ay tinuturing na isa sa pinakamatandang regatta o karera ng mga yate o bangka sa Asya. Ngayon na nasa ika-36 na taon ng pagdiriwang na ang nasabing festival, ito’y lumaki at lumaki mula sa simpleng karerahan ng mga bangka-de-paraw ng mga mangingisda noon, hanggang naging isa itong pang-akit sa mga turista at mga boat enthusiasts na rin. Tinaguriang ika-tatlong best tourism event ng ATOP (Assoctiation of Tourism Officers in the Philippines), maliban sa karera sa dagat at pagpinta ng mga layag ng mga paraw, dinagdagan na rin ng mga karagdagang activites ang nasabing pyesta. May sayawan ng samba, may fireworks display noong gabi bago ang fiesta at mga pakontest habang nasa kalagitnaan ng karera ang mga bangka.
Ang karera ngayon ay tila hinabaan at nagtagal ito ng mahigit 2 oras na umiikot mula sa Villa Beach ng Iloilo City, patungo sa Guimaras at pabalik.
Para sa mga hindi nakakaalam, ang paraw na marahil ang naging simbolo ng angking kagalingan ng mga Ilonggo pagdating sa industriya ng pandaragat o maritime industry. Kung tutuusin, dito mo rin matatagpuan ang kauna-unahang maritime university ng bansa at ang mismong Iloilo ay nagpapadala ng libo-libong mandaragat kada taon. Sa kasaysayan ng mga Ilonggo, pinaniniwalaang ito ang nagdala sa 10 datu na nanggaling pang Boreno (Malaysia na ngayon) na tumakas sa diktador nitong sultan, patungo sa Isla ng Panay ayon sa Maragtas. Dahil sa nakatira sa isla ang mga Panayanon, hindi maiiwasang gumamit at makipagsapalaran sa karagatan para manghuli ng isda, maglakbay at manakop ng ibang lugar. Ito ay naging tradisyon na nakamarka sa mga Ilonggo at pati na sa mga Panayanon.
Ang paraw ay isang uri ng banka (na may katig [outrigger sa Ingles] din) na nilagyang ng triangular na layag o sail na nagpopropel o nagpapatakbo sa bangka sa pamamagitan ng hangin. Kung minsan mas mabilis pa ito kumpara sa mga de-makina na bangka, na animo’y lumilipad sa mga alon. Madalas ginagamit ng mga mangingisda ito tuwing kalmado ang karagatan. Ito rin ang sasakyan patungong Guimaras mula sa Iloilo City noong wala pang makina ang mga bangka. Iniimagine ko na lang kung gaano kaganda ang itsura ng harbour ng Iloilo noong panahon na iyon, makita ang mga layag. Sa kabilang dulo ng Panay, ginagamit na ito bilang cruise banca/boat ng mga turista sa Boracay.
Dahil sa likas na sa mga Ilonggo ang pagiging masiyahin, binigyang parangal nila ang tradisyong nakaukit na sa kanilang kasaysayan at kamalayan. Isang tribute na naangkop sa mga bagong bayani ng bayan na naglalayag at nakikipagsapalaran sa karagatan, tila mga layag sa paraw, makulay at matatag.
Popularity: 24% [?]
Leave a Reply